Монгол Улсын Ерөнхийлөгчийн Эрүүл мэнд, спорт, нийгмийн бодлогын зөвлөх Т.Мөнхсайхан, Монгол Улсын Ерөнхий сайдын зөвлөх, “Монгол-Японы Тогтвортой хөгжлийн нийгэмлэг” төрийн бус байгууллагын тэргүүн Б.Баярсайхан нар 2023 оны хоёрдугаар сарын 14-19-ны өдрүүдэд Япон улсад ажлын айлчлал хийлээ. 

Тус айлчлалаар Монгол Улсын Ерөнхийлөгчийн санаачилгаар хэрэгжиж буй “Эрүүл монгол хүн” хөдөлгөөний хүрээнд Япон улстай хамтран Зүрх, судасны үндэсний төв байгуулах ажлын хүрээнд Япон улсын Эрүүл мэндийн сайд, Ноён Кацүнобу Катод бараалхаж, талууд санал солилцлоо. Айлчлалын хүрээнд Монгол Улсад Зүрх, судасны төв байгуулах ажлын хүрээнд хамтран ажиллах Япон улсын Үндэсний төв эмнэлэг, Накамура эмнэлгийн групп болон бусад холбогдох албаны хүмүүстэй уулзаж санал солилцов. Уулзалтын үеэр Монгол – Япон хоёр улсын хамтарсан симфозмыг Улаанбаатар хотноо зохион байгуулах асуудлаар уулзалт хийх Монгол Улсын Ерөнхий сайдын урилгыг Япон улсын талд хүргүүллээ.