Японы Улсын Засгийн газрын тэтгэлэгт “Залуу удирдагч” хөтөлбөрийг Нагояагийн их сургуулийн Анагаах ухааны сургуулийн Эрүүл мэндийн удирдлагын тэнхим 2003 оноос эхлэн хэрэгжүүлж Тайланд, Киргизстан, Кампучи, Казакстан, Узбекстан, Афганистан, Монгол улсаас эрүүл мэндийн салбарын мэргэжилтэнг хамруулдаг ажээ. Өнгөрсөн 20 жилийн хугацаанд Монгол Улсын Эрүүл мэндийн яамны хүний нөөцийн чадавхыг бэхжүүлэх зорилгоор нийт 23 мэргэжилтнүүд уг хөтөлбөрт хамрагдан Эрүүл мэндийн удирдлагаар магистрын зэрэг амжилттай хамгаалсан байна. Ерөнхийлөгчийн Тамгын газрын “Эрүүл Монгол хүн” төсөл, хөтөлбөрийн албаны дарга О.Чимэдсүрэн 2023 оны хоёрдугаар сарын 26-ны өдөр Нагояагийн их сургуулийн Анагаах ухааны сургуулийн Эрүүл мэндийн удирдлагын тэнхимийн “Залуу удирдагч” хөтөлбөрийн захирал Эйко Ямамототой уулзаж хамтран ажиллах чиглэлд санал солилцлоо.